میامی ایئرپورٹ پر امیزون کارگو طیارے کا حادثہ پانچ افراد جاں بحق

امریکہ[انٹرنیشنل ڈیسک]امریکی ریاست فلوریڈا کے شہر میامی کے بین الاقوامی ہوائی اڈے پر امیزون پرائم ایئر کے لیے پرواز کرنے والا ایک کارگو طیارہ لینڈنگ کے دوران حادثے کا شکار ہو گیا ہے۔تفصیلات کے مطابق طیارہ ‘بوئنگ 767-300′ (Boeing 767-300) تھا، جسے امیزون کے لیے ’21 Air’ نامی ایئرلائن کا عملہ چلا رہا تھا۔ طیارہ پوئرٹو ریکو کے شہر سان ہوان سے میامی پہنچا تھا۔میامی ایئرپورٹ پر اترتے ہی طیارہ لینڈنگ کے دوران رنوے پر رک نہ سکا اور آگے نکل گیا۔ ایئرپورٹ کی حد پار کرتے ہی طیارہ پاس کی سڑک پر جا پہنچا اور وہاں موجود متعدد گاڑیوں سے ٹکرا گیا۔گاڑیوں سے ٹکرانے کے فوراً بعد طیارے میں شدید آگ بھڑک اٹھی اور فضا میں سیاہ دھویں کے بادل چھا گئے۔ ریسکیو ٹیموں کے مطابق حادثے کے بعد طیارے سے جیٹ فیول (ایندھن) کے رساؤ کو روکنے کی کوششیں جاری ہیں۔
اس دردناک حادثے کے نتیجے میں کم از کم 5 افراد ہلاک اور 5 افراد شدید زخمی ہوئے ہیں۔ زخمیوں میں سے 3 کی حالت انتہائی تشویشناک بتائی جا رہی ہے جنہیں ٹراما سینٹر منتقل کر دیا گیا ہے۔ میامی-ڈیڈ فائر ریسکیو کے 60 سے زائد یونٹس نے موقع پر پہنچ کر آگ پر قابو پایا اور گاڑیوں میں پھنسے ہوئے افراد کو باہر نکالا۔ طیارے کے پائلٹ اور کو-پائلٹ بھی محفوظ بتائے گئے ہیں لیکن وہ بھی اس حادثے میں زخمی ہوئے ہیں۔حادثے کے بعد سیکیورٹی کی وجہ سے میامی ایئرپورٹ کی تمام پروازیں کچھ وقت کے لیے روک دی گئیں اور کئی سو فلائٹس تاخیر کا شکار ہوئیں۔امریکی ایوی ایشن اتھارٹی (FAA) اور نیشنل ٹرانسپورٹیشن سیفٹی بورڈ (NTSB) کی خصوصی ٹیمیں یہ معلوم کرنے کے لیے تحقیقات کر رہی ہیں کہ رنوے پر طیارہ کن وجوہات کی بنا پر قابو سے باہر ہوا۔امیزون کی ترجمان نے جانی نقصان پر گہرے دکھ اور تعزیت کا اظہار کرتے ہوئے کہا ہے کہ ان کی سب سے بڑی ترجیح متاثرہ خاندانوں کی مدد کرنا اور انتظامیہ سے تحقیقات میں مکمل تعاون کرنا ہے