چین کی الیکٹرانک انفارمیشن مینوفیکچرنگ صنعت کی آمدن میں چھ ماہ کے دوران18.5 فیصد اضافہ

بیجنگ(انٹرنیشنل ڈیسک)چین کی الیکٹرانک انفارمیشن مینوفیکچرنگ صنعت کی آمدن میں رواں سال کی پہلی ششماہی میں 18.5 فیصد اضافہ ریکارڈ کیا گیا۔ چینی ٹی وی نے چین کی وزارتِ صنعت و انفارمیشن ٹیکنالوجی کے اعداد و شمار کے حوالے سے بتایا ہے کہ رواں سال کی پہلی ششماہی میں ملک کی الیکٹرانک انفارمیشن مینوفیکچرنگ صنعت نے تیز رفتار ترقی کا سلسلہ برقرار رکھا۔ پیداوار میں اضافہ، برآمدات میں استحکام، کاروباری منافع میں مسلسل بہتری اور سرمایہ کاری میں متوازن نمو ریکارڈ کی گئی۔پہلی ششماہی میں الیکٹرانک انفارمیشن مصنوعات کی برآمدات میں بھی مستحکم بہتری دیکھنے میں آئی۔ اس شعبے کی برآمدی ترسیلات کی مجموعی مالیت میں 7.8 فیصد اضافہ ہوا، جو جنوری تا مئی کے مقابلے میں 1.7 فیصد پوائنٹس زیادہ ہے۔ اسی دوران الیکٹرانک انفارمیشن صنعت کی مجموعی کاروباری آمدن 9.41 ٹریلین یوان تک پہنچ گئی جو گزشتہ سال کی نسبت 18.5 فیصد زیادہ ہے اور اس شعبے کی مسلسل مضبوط اقتصادی کارکردگی کی عکاسی کرتی ہے۔