عراقی وزیراعظم کا ایران کا اہم دورہ، دوطرفہ تعلقات بڑھانے پر اتفاق

تہران (انٹرنیشنل ویب ڈیسک) عراقی وزیراعظم علی الزیدی امریکہ کے دورے کے بعد ایران پہنچ گئے جہاں انہوں نے ایرانی صدر مسعود پزشکیان اور اعلی ایرانی قیادت سے ملاقاتیں کیں۔غیر ملکی میڈیا کے مطابق صدر مسعود پزشکیان اور عراقی وزیراعظم کے درمیان ہونے والے مذاکرات میں دوطرفہ تعلقات، اقتصادی تعاون، توانائی، تجارت اور علاقائی سلامتی سمیت مختلف امور پر تفصیلی تبادلہ خیال کیا گیا۔دونوں ممالک نے اقتصادی تعاون اور مشترکہ سرمایہ کاری کو فروغ دینے پر اتفاق کیا، جبکہ نقل و حمل اور شہری تعاون سے متعلق نئے معاہدے بھی طے پائے۔عراقی وزیراعظم علی الزیدی نے کہا کہ عراق اور ایران کی سلامتی ایک دوسرے سے جڑی ہوئی ہے اور عراق اپنی سرزمین ایران کے خلاف کسی بھی کارروائی کے لیے استعمال نہیں ہونے دے گا۔ایرانی صدر مسعود پزشکیان نے کہا کہ ایران اور عراق کے درمیان تاریخی، مذہبی اور ثقافتی رشتے نہایت مضبوط ہیں، جبکہ خطے کا استحکام دونوں ممالک کی ترقی اور خوشحالی کے لیے ناگزیر ہے۔