شہر میں ٹریفک کے نظام کو بہتر بنانا اور عوام کو بلا رکاوٹ آمدورفت کی سہولت فراہم کرنا ضلعی انتظامیہ کی اولین ترجیحات میں شامل ہے،اسسٹنٹ کمشنر کوئٹہ سٹی امیر حمزہ

کوئٹہ(ویب ڈیسک)وزیراعلیٰ بلوچستان کے احکامات اور ڈپٹی کمشنر کوئٹہ کی ہدایت پر اسسٹنٹ کمشنر کوئٹہ سٹی امیر حمزہ نے ٹریفک پولیس کے ہمراہ زرغون روڈ سمیت شہر کے مختلف علاقوں میں ٹریفک کی روانی میں خلل ڈالنے والے رکشوں اور تجاوزات کے خلاف کارروائی کی۔کارروائی کے دوران زرغون روڈ کی سروس روڈ اور مختلف ہسپتالوں کے سامنے غیر قانونی طور پر کھڑے تمام رکشوں کو فوری طور پر ہٹا دیا گیا۔ اس موقع پر اسسٹنٹ کمشنر امیر حمزہ نے رکشہ ڈرائیوروں کو ہدایت کی کہ وہ سڑکوں اور سروس روڈز پر رکشے کھڑے کرنے سے گریز کریں تاکہ ٹریفک کی روانی متاثر نہ ہو اور شہریوں کو آمدورفت میں مشکلات کا سامنا نہ کرنا پڑے۔انہوں نے کہا کہ شہر میں ٹریفک کے نظام کو بہتر بنانا اور عوام کو بلا رکاوٹ آمدورفت کی سہولت فراہم کرنا ضلعی انتظامیہ کی اولین ترجیحات میں شامل ہے۔ہسپتالوں کے سامنے رکشوں اور دیگر گاڑیوں کی بے ہنگم پارکنگ کے باعث مریضوں اور ان کے لواحقین کو بھی مشکلات پیش آتی ہیں، جس کے تدارک کے لیے مؤثر اقدامات کیے جا رہے ہیں۔اسسٹنٹ کمشنر نے ٹریفک پولیس اور متعلقہ حکام کو ہدایت کی کہ اہم شاہراہوں، سروس روڈز اور ہسپتالوں کے اطراف ٹریفک کی روانی برقرار رکھنے کے لیے تجاوزات اور غیر قانونی پارکنگ کے خلاف کارروائی کا سلسلہ جاری رکھا جائے۔