صوبائی حکومت اور محکمہ کھیل بلوچستان صوبے کے نوجوانوں کو معیاری کھیلوں کی سہولیات کی فراہمی کیلئے ہرممکن اقدامات کررہا ہے،مشیر کھیل مینا مجید، سیکرٹری کھیل درا بلوچ کا تقریب سے خطاب

کوئٹہ(ویب ڈیسک)صوبائی مشیر کھیل مینا مجیداور سیکرٹری سپورٹس درا بلوچ نے کہا ہے کہ صوبائی حکومت اور محکمہ کھیل بلوچستان صوبے کے نوجوانوں کو معیاری کھیلوں کی سہولیات کی فراہمی کیلئے ہرممکن اقدامات کررہا ہے،صوبے کے نوجوانوں کھلاڑیوں میں ٹیلنٹ کی کوئی کمی نہیں ہے بلوچستان کے باصلاحیت کرکٹرز کو بھی قومی سطح پر بھرپورنمائندگی دی جانی چاہئے۔ یہ بات انہوں نے جمعہ کو ایوب سپورٹس کمپلیکس میں محکمہ کھیل حکومتِ بلوچستان کی جانب سے تزئین و آرائش اور اپ گریڈیشن کے بعد بلوچستان سپورٹس بورڈ کرکٹ اکیڈمی کے افتتاح کے موقع پر منعقدہ تقریب سے خطاب کرتے ہوئے کہی۔صوبائی مشیرِ کھیل و امورِ نوجوانان مینا مجید بلوچ نے ربن کاٹ کرباقاعدہ اکیڈمی کا افتتاح کیا، اس۔ افتتاحی تقریب میں سیکرٹری کھیل و امورِ نوجوانان دْرا بلوچ ایڈیشنل سیکرٹری کھیل سجاد اسلم، ڈسٹرکٹ سپورٹس آفیسر کوئٹہ ارسلان خان، اکیڈمی کوچ بشیر مگسی، اکیڈمی کوچ ارباب شاکر و دیگر عہدیداران سمیت اکیڈمی کے کھلاڑیوں نے بڑی تعداد میں شرکت کی۔ صوبائی مشیرِ کھیل مینا مجید بلوچ نے کہا کہ حکومتِ بلوچستان نوجوانوں کو معیاری کھیلوں کی سہولیات فراہم کرنے کے لیے عملی اقدامات کر رہی ہے۔ انہوں نے بتایا کہ ہم نے مسلسل کرکٹ اکیڈمی کا دورہ کر کے درپیش مسائل اور موجودہ سہولیات کا تفصیلی جائزہ لیا، جس کے بعد اکیڈمی کی بہتری اور اپ گریڈیشن کا فیصلہ کیا گیا۔ ان کے مطابق اکیڈمی میں پہلے صرف دو کرکٹ پچز موجود تھیں جن کی تعداد بڑھا کر دس کر دی گئی ہے، جبکہ تمام پچز پر اعلیٰ معیار کے نیٹس بھی نصب کر دیے گئے ہیں۔ اس کے علاوہ ڈریسنگ رومز اور واش رومز کی مکمل تزئین و آرائش کے ساتھ انہیں فعال بنایا گیا ہے، فرش پر ٹف ٹائلز لگائی گئی ہیں، پینے کے صاف پانی کے لیے واٹر فلٹریشن سسٹم نصب کیا گیا ہے اور بجلی کا درپیش مسئلہ بھی حل کر دیا گیا ہے۔تقریب سے خطاب کرتے ہوئے سیکرٹری کھیل دْرا بلوچ نے کہا کہ بلوچستان کے کرکٹرز نے ہر سطح پر اپنی بہترین صلاحیتوں کا لوہا منوایا ہے۔ محکمہ کھیل کا بنیادی مقصد نوجوان کھلاڑیوں کو جدید تربیتی سہولیات فراہم کرنا ہے تاکہ وہ مستقبل میں قومی اور بین الاقوامی مقابلوں میں نمایاں کامیابیاں حاصل کر سکیں۔ انہوں نے اس بات پر بھی زور دیا کہ تمام صوبوں کے کھلاڑیوں کو یکساں مواقع ملنے چاہئیں اور بلوچستان کے باصلاحیت کرکٹرز کو بھی قومی سطح پر بھرپور نمائندگی دی جانی چاہیے۔