ٹی ٹوئنٹی ورلڈکپ کوالیفائر: سابق آسٹریلوی کرکٹر پرتگال کرکٹ ٹیم کے کپتان مقررٹی ٹوئنٹی ورلڈکپ کوالیفائر میں پرتگال کی ٹیم اپنی مہم کا آغاز 14اگست کو اسرائیل کے خلاف کریگی

سڈنی (سپورٹس ڈیسک)سابق آسٹریلوی آل رانڈر موئسس ہنریکس کو پرتگال کرکٹ ٹیم کا کپتان مقرر کر دیا گیا۔39سالہ ہنریکس کو فن لینڈ میں 14 سے 20 اگست تک ہونے والے ٹی ٹوئنٹی ورلڈ کپ یورپ سب ریجنل کوالیفائر سی کیلئے پرتگال کی 14 رکنی ٹیم کا کپتان مقرر کیا گیا ہے،اس ٹورنامنٹ میں گروپ بی میں پرتگال، اسرائیل، جرمنی، یونان اور چیکیا کی ٹیمیں شامل ہوں گی، جبکہ گروپ کی فاتح ٹیم 21 اگست کو ہونے والے فائنل میں جگہ بنائے گی۔موئسس ہنریکس نے آسٹریلیا کی جانب سے 4 ٹیسٹ، 16 ون ڈے اور 24 ٹی ٹوئنٹی انٹرنیشنل میچز کھیلے، انہوں نے 2021 میں آسٹریلیا کے لیے آخری میچ کھیلا۔واضح رہے کہ ہنریکس پرتگالی جزیرے مڈیرا میں پیدا ہوئے تھے، جو عالمی فٹبال اسٹار کرسٹیانو رونالڈو کی جائے پیدائش بھی ہے۔ ہنریکس بچپن میں اپنے خاندان کے ساتھ آسٹریلیا منتقل ہوگئے تھے، جہاں انہوں نے کرکٹ میں اپنا کامیاب کیریئر بنایا اور نیو ساتھ ویلز اور سڈنی سکسرز کی نمائندگی کی۔انہوں نے گزشتہ ماہ آسٹریلوی ڈومیسٹک کرکٹ سے ریٹائرمنٹ کا اعلان کیا تھا،اس وقت آئی سی سی مینز ٹی ٹوئنٹی رینکنگ میں پرتگال 37ویں نمبر پر ہے اور ٹیم عالمی سطح پر اپنی جگہ بنانے کے لیے کوالیفائر میں کامیابی حاصل کرنے کی خواہاں ہے۔ٹی ٹوئنٹی ورلڈکپ کوالیفائر میں پرتگال کی ٹیم اپنی مہم کا آغاز 14 اگست کو اسرائیل کے خلاف کرے گی۔گروپ کی فاتح ٹیم فائنل میں پہنچے گی، جہاں کامیابی کی صورت میں وہ یورپی ریجنل فائنل کے لیے کوالیفائی کر جائے گی۔ یورپی ریجنل فائنل کی ٹاپ دو ٹیمیں 2028 کے ٹی ٹوئنٹی ورلڈ کپ کے لیے عالمی کوالیفائر میں پہنچیں گی، جس کی میزبانی آسٹریلیا اور نیوزی لینڈ کریں گے۔