سپرنیٹ ٹیکنالوجیز کے 915 ملین روپے کے رائٹس ایشو کو 98.16 فیصد سبسکرپشن تقریباً 898 ملین روپے کی سرمایہ کاری موصول

کراچی (ویب ڈیسک)سپرنیٹ ٹیکنالوجیز لمیٹڈ کے تقریباً 915 ملین روپے مالیت کے رائٹس ایشو کو 98.16 فیصد سبسکرپشن موصول ہوئی ہے، جس کی مالیت تقریباً 898 ملین روپے بنتی ہے۔ کمپنی کے مطابق رائٹس ایشو کو ملنے والی تقریباً مکمل سبسکرپشن سے ظاہر ہوتا ہے کہ شیئر ہولڈرز کو کمپنی کی کاروباری حکمت عملی، توسیعی منصوبوں اور مستقبل کے امکانات پر اعتماد ہے۔کمپنی کے مطابق رائٹس ایشو سے حاصل ہونے والی رقم ورکنگ کیپیٹل کی ضروریات پوری کرنے، بڑے پیمانے پر جاری منصوبوں پر عملدرآمد اور ٹیلی کارڈ لمیٹڈ کے ساتھ شیئر پرچیز ایگریمنٹ کے تحت واجب الادا رقم کے ایک حصے کی ادائیگی کے لیے استعمال کی جائے گی۔سپرنیٹ ٹیکنالوجیز نے گزشتہ چند برسوں کے دوران ٹیلی کمیونیکیشن انفراسٹرکچر، انفارمیشن ٹیکنالوجی، سائبر سیکیورٹی اور دیگر ٹیکنالوجی سلوشنز کے شعبوں میں اپنی کاروباری سرگرمیوں کو وسعت دی ہے۔ کمپنی کے اعداد و شمار کے مطابق اس کی نان سروس آمدنی مالی سال 2021ء  میں تقریباً 682 ملین روپے تھی جو مالی سال 2025ء  میں بڑھ کر 5 ارب روپے سے تجاوز کرگئی، جبکہ سروسز کے کاروبار سے 4.2 ارب روپے سے زائد آمدنی حاصل ہوئی۔ اس طرح مالی سال 2025ء میں کمپنی کی مجموعی آمدنی تقریباً 9.2 ارب روپے رہی۔سپرنیٹ ٹیکنالوجیز کے مطابق کمپنی نے ٹیکنالوجی اور سائبر سیکیورٹی کے شعبوں میں متعدد بڑے منصوبے بھی حاصل کیے ہیں۔ حال ہی میں تقریباً ایک ارب روپے مالیت کا ہارڈویئر اور سروسز منصوبہ حاصل کیا گیا ہے، جس پر مالی سال 2026ء  اور 2027ء  کے دوران مرحلہ وار عملدرآمد متوقع ہے۔ کمپنی کا کہنا ہے کہ بڑے منصوبوں میں توسیع اور ٹیکنالوجی کے مختلف شعبوں میں کاروباری سرگرمیوں میں اضافے سے مستقبل میں آمدنی کے مزید مواقع پیدا ہوں گے۔رائٹس ایشو کے باقی رہ جانے والے حصص کمپنیز ایکٹ 2017ء  کی دفعہ 83(1)(a)(iv) کے تحت بورڈ آف ڈائریکٹرز کی جانب سے موزوں قرار دیے جانے والے افراد کو پیش اور الاٹ کیے جائیں گے۔ کمپنی کے مطابق اس عمل کی تکمیل کے بعد اگر ضرورت محسوس ہوئی تو باقی حصص کے حوالے سے انڈر رائٹر سے رجوع کیا جائے گا۔کمپنی کا کہنا ہے کہ رائٹس ایشو کے لیے 98.16 فیصد سبسکرپشن موصول ہونا سرمایہ بڑھانے کے عمل میں اہم پیش رفت ہے۔ اس سے کمپنی کو کاروباری ضروریات پوری کرنے، بڑے منصوبوں پر سرمایہ کاری اور ٹیکنالوجی و سائبر سیکیورٹی کے شعبوں میں توسیع کے لیے اضافی مالی وسائل دستیاب ہوں گے۔