مستونگ کلی ببری، خاتون پر مبینہ تیزاب گردی اور تشدد، مقدمہ درج

مستونگ[ویب ڈیسک]کلی ببری میں ایک افسوسناک واقعہ پیش آیا جہاں اطلاعات کے مطابق ایک خاتون پر مبینہ طور پر تیزاب پھینکا گیا، جس کے نتیجے میں اس کے چہرے اور آنکھوں کو شدید نقصان پہنچنے کی اطلاعات ہیں۔ ذرائع کے مطابق خاتون کو مبینہ طور پر تشدد کا نشانہ بھی بنایا گیا، جس سے اس کے جسم پر متعدد زخم آئے۔متاثرہ خاتون کے والد محمد ایوب سمالانی نے واقعے پر شدید تشویش کا اظہار کرتے ہوئے انصاف اور تحفظ کا مطالبہ کیا ہے۔ پولیس کے مطابق واقعے کا مقدمہ تھانہ درینگڑ میں درج کر لیا گیا ہے، جبکہ واقعے کی مزید تحقیقات جاری ہیں۔واضح رہے کہ جون 2026 میں کوئٹہ کے سول اسپتال میں ایک خاتون ڈاکٹر پر مبینہ تیزاب حملے کا واقعہ بھی رپورٹ ہوا تھا، جس کے بعد بلوچستان میں خواتین کے تحفظ اور تیزاب گردی کی روک تھام کے حوالے سے تشویش مزید نمایاں ہوئی۔متاثرہ خاتون کو فوری اور مکمل طبی سہولیات، قانونی تحفظ اور انصاف فراہم کیا جائے۔ہم وزیراعلیٰ بلوچستان سرفراز بگٹی، آئی جی پولیس بلوچستان اور ڈپٹی کمشنر مستونگ سے اپیل کرتے ہیں کہ واقعے کا شفاف اور غیرجانبدارانہ نوٹس لیا جائے، متاثرہ خاتون کو مکمل تحفظ فراہم کیا جائے اور اگر تحقیقات میں ملزمان کا جرم ثابت ہو تو ان کے خلاف قانون کے مطابق سخت کارروائی عمل میں لائی جائے۔ساتھ ہی صوبائی حکومت سے مطالبہ ہے کہ بلوچستان میں تیزاب گردی اور خواتین پر تشدد کے واقعات کی روک تھام کے لیے مؤثر اقدامات کیے جائیں اور ایسے واقعات میں متاثرین کو فوری طبی و قانونی معاونت فراہم کی جائے۔